Luk 5 | LpxULB | STEP | Iyania ifa lojo iluluŋ no huwo lokudak Yesu ette hitira hiram no Hollum, oweita ifa inyeja da halai ha hari ne hitok na lara fure Genesaret.

Luke 5

1 Iyania ifa lojo iluluŋ no huwo lokudak Yesu ette hitira hiram no Hollum, oweita ifa inyeja da halai ha hari ne hitok na lara fure Genesaret. 2 Owolo inyeja togolisen arik aŋateli a halai ha hari ne hitok. Aŋadou hairietak ha ham tere ette isieja hilla boita. 3 Aŋaidamik Yesu a hotue ho togoli naboite nafa he Simone, ette inyeja hifi Simone hotosulak a hifioŋ tere ho fau. Ette inyeja ŋahunyie hitiyena huwo to hotue ho togoli.

4 Ifa lojo inyeja lotohu hiroita, ejo inyieya de Simone, “Yari togoli a hiji ha hari ade lowudo ette iye ŋabirok boita innohoi anyar lerietu ham.” 5 Ette Simone hitiraŋ hijo, “leitok, egema iyyohoi binno harie daŋ, obe lerietu hinnak hirro, hati te hiro tonohoi, ahu naŋ ŋaibusak boi a hifioŋ.” 6 Ifa lojo isieja legem, aŋaiduduhu iluluŋ na ham, ette boi no hosie fufuto. 7 Ette isieja hilloloŋ loriahat hosie ta hana a togoli nabo anyar lafanu hiluak isieja. Ette isieja ŋafanu ŋaifutak togolisen nuhe, eitek togolisen ŋadillori.

8 Hati ifa lojo Simone Peturu lowolo inyeja, ette ŋahuyek do huŋu inno Yesu, hijo, “Ino teni hanaŋ, ara naŋ heyani, habu.” 9 Eliliha ifa inyeja, ho luhe illafa lowuon honyie, da ham innafa le nefu isieja ette ŋayari. 10 Ara ifa isieja Yakobo ho Yoane, lenyok he Sebedi, illafa lara eriahat ho Simone. Ette Yesu hijo de Simone, “Idek ha ibaŋ, nyo tafar te inna a hosiere ira iso iye hairietani ho huwo.” 11 Ifa lojo isieja le yani togolisen a halai, aŋaibusak inyeja daŋ ette ŋaijufari Yesu.

12 Owon Yesu ifa do bore gala nabo, hati dee, owon lobo tihoni de lo lomui ha talulu. Ifa lojo owolo Yesu, ette inyeja ŋahuyek to homoŋ a fok ette lelia do honyie hijo,”Ai! Habu, kuya liwak iye, itilibo naŋ.” 13 Ette Yesu ŋaitibisak hana no honyie ette hitir injieja hijo, “Awak naŋ. Teliboi.” Tere ojo talulu kuak abusak inyeja.

14 Ette inyeja hitoto tihoni le obe ho inyie lelimak do lobo tihoni, hati elimak inyeja hijo, “Inno ikoi nohoi ette iye ŋaituhutek kwan no hoi de ha fadiri ette ebuluc liboi no hoi, iyya lojo hifahita inno Musa hijo anyar lara hituhuti do hosie.”

15 Hati ojo egem nohonyie a rasa ŋaisarari a hosiere, ette iluluŋ no huwo ŋaiduduhuni anyar afanu hitira hitiyena hidofe anyar etilib iŋweiti hosie. 16 Hati odulei inyeja ŋaino amai no lodua omojori.

17 Ifa do holoŋi nuhe etiyanari Yesu, owon ifa hilak Farisei ha haitiyenak ho hifahiti ille etole de, illafa lafanu ta maisok hinnak do fau ha Galileya ho Yudeyo, ette hido to bore gala no Yerusalem. Owon ifa inyeja ho golon no Habu no etilibori igweiti.

18 Nia aŋafanu hilak huwo, a kafita tihoni loloŋura te biris, ette siaha ikoi ne leyarie inyeja a hotue haji anyar letiferik inyeja da fau de lerek he Yesu. 19 Obe isieja oruma ikoi ne eyarie inyeja a hotue hijo obolo iluluŋ no huwo, hati ette isieja ŋarek a hide ha haji. Ette isieja ŋaitusuru inyeja te biris honyie de hiji ho huwo de lerek ho Yesu.

20 Ifa owolo inyeja hiruk nohosie, ette Yesu hijo. “Illa, ebusahini hiyata innohoi.” 21 Hati Hatiyenak he hifahita ojo Farisei hifiia inne hijo, “ŋai le eiramitari fure no Hollum? ŋai le ŋaibusak hiyata, arari Hollum hamai?”

22 Ette Yesu hiyen higilita inno hosie ette hitiraŋ, “Nyo lifia itai inne da tenya hatai? 23 Nari lefiak tehijio, ‘ŋaibusahini hiyata hoi kuya? ‘Totei tolotoŋ?’ 24 Hati anyar liyen itai hijo owon Lenyi ho tihoni ho golon da fau haŋabusak hiyata, ajo naŋ dohoi, ‘Totei a hide, todumu biris nohoi, inno a haŋ hoi.’”

25 Tere odoto tihoni le a hide tehiji hosie ette ŋadumu biris nohonyie nafa leferie inyeja, ette ŋacahari a haŋ honyie he hitihabuo Hollum. Eliliha ifa huwo bi daŋ ette isieja hitihabuo Hollum. 26 Efut isieja habaŋi, ette hijo, “Aŋawolo iyohoi rori inno logol Eina.”

27 Da halu ho rori inne, aŋainno Yesu tere ette wolo haiduduhani ho musuru fure no honyie Lefi leitole damai he leiduduhari ho musuru. Ette inyeija hijo do honyie, “Ijufuni naŋ.” 28 Niya aŋaibusak Lefi saŋ daŋ, odoto ette ŋaijufari Yesu.

29 Ette Lefi ŋahuhumak karama nehitok de Yesu da haŋ honyie, owuon hido ifa haiduduhak ho musuru ille loluŋa de, ojo hilak huwo ille lowuon hettebuan ladaha hosie. 30 Hati ojo Farisei ho hetiyanak he hifahita hiŋugunuta de ejefat hijo, “Jie lidaha itai imata ha hadumak ho musuru ho huwo hayak?” 31 Ette Yesu hitiraŋ isieja, “Obe huwo ille lelibo lesiaha diktor, hati huwo ille loŋwai lesiaha. 32 Abe naŋ latu lelilloŋori huwo ille lebis anyar eloito, hati hilloloŋo hayak hettefelai.”

33 Ette isieja hijo do Yesu, “Eya ifa ejifat ille Yoani ette hijo fe omojo gagaga. Ojo hido ejifat ille Farisei ehuma daŋ ani. Hati ejifat illohoi adaha amata hido.” 34 Ojo Yesu dohosie, “Heremik iso leriahat ha hayamani hiyya olowuon hayamani dehiji hosie? 35 Hati afanu iso holoŋi inne leyairi hayamani tehiji hosie, ette hati isieja hiyya do holoŋi nuhe.”

36 Ette Yesu hido hiro do hosie hitiriami hijo, “Obe tihoni leritu boŋo letiŋ tere ho boŋo ŋejuk ette ŋarifak do boŋo maruani. Hati legem inyeja ani, eremik hirit boŋo nara ŋejuk.

37 Hido ifa obe tihoni eturak fino ŋejuk ahotui rokwo maruani, legem ani, ette fino ŋejuk hirit rokwo nia, ette fino nia ŋaduhori, ette rokwo nia ŋuasa. 38 Hati fino ŋejuk anyar loduhohini do hotui ho rokwo ŋejuk. Obe tihoni, Da halu he himat fino maruani, hiwak fino ŋejuk, ojo iso inyeja, ‘Elibo maruani.’”